សុខភាព

 

តាមក្បួន វេជ្ជសាស្ត្រចិន បានឱ្យដឹងថា តួអណ្តាតទាំងមូល មានទំនាក់ទំនង យ៉ាងជិតស្និទ្ធជាមួយ នឹងសុខភាព រាងកាយ ហើយគេអាចបែងចែក តួអណ្តាតទាំងមូលជា ៤ ផ្នែក គឺចុងអណ្តាត ផ្នែកកណ្តាលអណ្តាត គល់អណ្តាត និងគែមអណ្តាត ទាំង សងខាង ។ មុខងារដ៏សំខាន់ របស់អណ្តាតគឺ សម្រាប់ទទួលយក រសជាតិអាហារ សម្រួលសំឡេង គ្រលៀវអាហារ និងជួយដល់ ការលេបអាហារ ។ ម៉្យាងទៀតចំណុច នីមួយៗនៃតួអណ្តាត ទាំងមូលទាក់ទងនឹង រាងកាយខាងក្នុង ដូចជាចុងអណ្តាត ចំណុះឱ្យបេះដូង ដែលឆ្លុះបញ្ចាំងពីការ ប្រែប្រួលនៃជំងឺបេះដូង និង ជំងឺសួត ។ ចំណែកឯផ្នែក កណ្តាលអណ្តាត ចំណុះឱ្យប្រព័ន្ធ រំលាយអាហារ ដែលឆ្លុះបញ្ចាំងពី ការប្រែប្រួលនៃ ជំងឺពោះវៀន និង ក្រពះ ។ រីឯគល់អណ្តាត ចំណុះឱ្យក្រលៀនដែល ឆ្លុះបញ្ចាំងពី ការប្រែប្រួល នៃជំងឺក្រលៀន និង ប្លោកនោម ។ ចំពោះគែមអណ្តាត ទាំងសងខាង ចំណុះឱ្យថ្លើមប្រមាត់ ដែលឆ្លុះបញ្ចាំង ពីការប្រែប្រួល នៃជំងឺថ្លើម និង ប្រមាត់ ។

តាមធម្មតា ទ្រង់ទ្រាយនៃ អណ្តាតដែលបង្ហាញថា រាងកាយមាន សុខភាពល្អ ត្រូវមានពណ៌ក្រហម ប្រឿងៗ ជ្រាំងស្តើង ហើយស តួអណ្តាតទន់ល្មឿយ និង គ្រលាស់បានតាម ចំណង់ចំណូលចិត្ត ព្រមទាំងមានទំហំ មិនធំ មិនតូច មិនធាត់ មិនស្គមពេក ។ រីឯការប្រែប្រួល នៃទ្រង់ទ្រាយអណ្តាត ឬ ជ្រាំង អាចឆ្លុះបញ្ចាំង ពីការប្រែប្រួលនៃជំងឺ គ្រឿងក្នុងនៃរាងកាយ ។
ម៉្យាងទៀត ការហាត់ពត់ មុខងារអណ្តាត អាចនាំមកនូវ សុខភាពល្អ ដូចជា ៖
* ទំពាឱ្យម៉ដ្ឋ គ្រលៀវលេបយឺតៗ
នៅពេលទទួលទាន អាហារ ត្រូវទំពាឱ្យម៉ដ្ឋ និង គ្រលៀវលេបយឺតៗ ។ បើតាមការស្រាវជ្រាវ របស់អ្នកឯកទេសផ្នែក វេជ្ជសាស្ត្របានរកឃើញថា ក្នុងពេលដែលអណ្តាត កំពុងតែជ្រាវច្របល់ អាហារអាចបង្កើន ការចងចាំរបស់ខួរក្បាល រីឯចលនានៃ ការទំពាឱ្យម៉ដ្ឋ គ្រលៀវលេបយឺតៗ មានអំណោយផលល្អ ក្នុងការស្រូបយកនូវ ការរំលាយអាហារ ហើយអាចការពារ ជំងឺពោះវៀន និង ក្រពះ ។
* ការច្រៀងជួយទ្រទ្រង់ដល់សុខភាព
ការច្រៀងជាញឹកញាប់មានអំណោយផលល្អដល់ចលនាអណ្តាត និង អាចការពារជំងឺឈឺថ្កាត់ទៀតផង ។ ការ ស្រាវជ្រាវបានរកឃើញថានៅពេលហាត់ច្រៀង សំខាន់បំផុតសាច់ដុំបានប្រមូល ផ្តុំនៅផ្នែកខាងលើនៃដងខ្លួន ហើយអាចជួយបង្កើនចរន្ត ឈាមរត់នៃសរសៃបេះដូងដំណើរការបានស្រួល ។ ម៉្យាងទៀតការច្រៀងអាចស្រូបយក អុកស៊ីហ្សែនកាន់តែច្រើនចូលក្នុងរាងកាយ ហើយ ដែលអាចជួយឱ្យប្រព័ន្ធសរសៃប្រសាទមានភាពរហ័សរហួន ជួយសម្រួលដល់ការដកដង្ហើម ដែលអាចជួយ កាត់បន្ថយការកើតរោគផ្តាសាយទៀតផង ៕